Avannaata Kommunia sulianik angajoqaatut aappariit meeraasa pingasut inissinneqarnerinut angerlartinneqarnerinullu tunngasunik suliarinninnermini amerlasoorpassuarnik ilungersunartunillu kukkussuteqarsimasoq Ombudsmandi oqaaseqaammi nutaami eqikkaalluni inerniliivoq.

Ombudsmandi oqaaseqaammi ilaatigut allappoq:

• kommuni politiinit paasissutissanik nutaanik tigusaqarnermi kingornatigut angajoqqaat aappariit meeraasa angerlarsimaffiup avataani inissisimaneqaannarnissaannut angerlartinneqarnissaannulluunniit tunngavissaqarnersoq isummersimasariaqaraluartoq, meeqqallu inissinneqarsimanerat aalajangiusimaneqassasoq imaluunniit meeqqat angerlartinneqassasut aalajangiisimasariaqaraluarluni,
• kommunip aalajangiinerinut tunngavilersuutit amigaatilerujussuusut,
• kommuni inissiinissamik angerlartitsinissamillu aalajangiinermini naammagittaalliornissamut periarfissaq pillugu kukkusumik erseqqarluttumilluunniit ilitsersuisarsimasoq,
• kommuni suliap kommunimi suliareqqitassanngortillugu utertinneqarnissaanik aalajangiinerup kingornatigut nutaamik aalajangiiniaasaarpallaarsimasoq,
• kommunip inissiisoqarnissaanik aalajangiineri angajoqqaanut aappariinnut tamanut meeqqanut angajoqqaatut oqartussaassusermik tigummiaqartuusunut nalunaarutigineqartussaasimasut,
• angerlartitsinissamik qinnutigisaq allakkatigut tunniunneqassasoq kommunip piumasaqaatigisinnaanngikkaa, kommunilu angajoqqaat aappariit meeqqatik angerlartikkumallugit kissaatigigitsik oqaasiinnartigut saqqummiussaat tunngavigalugit iliuuseqarsimasariaqaraluartoq,
• piffissap angajoqqaat aappariit angerlartitsinissamik qinnutigisaannik suliarinninnerminut kommunip atugaa sivisuallaarujussuartoq,
• kommuni angajoqqaat aappariit meeraasa angerlartinneqarnissaannik suliat suliarineqarneranni suliani allagaatit kommunimut nuuffigineqartumut tamatuma peqatigisaanik nassiunnagit angajoqqaat aappariit illoqarfimmut allamut nuussimanerat tunngavilersuutigalugu unitsitsigami ilungersunartunik kukkussuteqarsimasoq.

Ombudsmandi eqikkaalluni aammattaaq inerniliivoq suliani annertunerusumik kukkussuteqartoqarlunilu sumiginnaasoqarsimasoq taamaattumilllu oqaaseqaatini pillugu Inatsisartut Inatsisinut Ataatsimiititaliaannut kommunalbestyrelsimullu Ombudsmandi pillugu inatsimmi § 23 tunngavigalugu nalunaaruteqarsimalluni.

Ombudsmandip oqaaseqaataa uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.