Innuttaasoq kalaallit oqaasii atorlugit kiffartuunneqarnissaminik kissaateqartoq oqartussaasup nalunngippagu naliliippalluunniit aalajangiineq qallunaatooq innuttaasumut nassiunneqaruni aalajangiinerup kalaallisuumut nutserneqarneranik ilaqartinneqartartussaasoq Ombudsmandip oqaaseqaammi nutaami suli ataasiarluni erseqqissarpaa.

Naammagittaalliuutitut suliamik suliarinninnermut atatillugu piffissaq Naammagittaalliuuteqartarfiup aalajangiinerata kalaallisuuata nassiunneqarnissaanut sivisoorujussuarmik utaqqiffiusartoq Ombudsmandip ilaatigut maluginiarpaa. Tassa imaappoq Naammagittaalliuuteqartarfiup aalajangiinerata qallunaatuuata siulliutillugu nassiunneqarnerata kingornatigut aalajangiinerup kalaallisuua aatsaat qaammatit arlallit qaangiunneranni innuttaasunut nassiunneqartartoq.

Naammagittaalliuuteqartarfiup aalajangiinernik nutserisarnermini aamma allakkanik ulluliisarnermini nassiussisarnerminilu periaasia nammineerluni misissuiffigilerniarlugit Ombudsmandi tamanna tunngavigalugu aalajangerpoq.

Ombudsmandi naliliivoq aalajangiinerup qallunaatuuanik siulliullugu nassiusseriarluni kalaallisuuanik aatsaat qaammatit arlallit qaangiunneranni nassiussisarnermik Naammagittaalliuuteqartarfiup siusinnerusukkut periaaseqarsimanera suliassat suliarineqartarnerat pillugu inatsimmut naapertuuttuusimanngitsoq.

Naammagittaalliuuteqartarfiup misissuinermut atatillugu Ombudsmandimut oqaatigaa Naammagittaalliuuteqartarfiup qallunaatut aalajangiineri taakkua kalaallisuui piareeraangata siunissami ataatsikkoortillugit nassiunneqartalerniartut.

Naammagittaalliuuteqartarfiup paasissutissiissutigisai Ombudsmandip maluginiarpai.

Ombudsmandip oqaaseqaataa uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.

Suliassat suliarineqartarnerat pillugu inatsimmi oqaatsit pillugit ma-littarisassat

Innuttaasoq pisortani oqartussaasunut saaffiginnittoq oqaatsit pineqartup kiffartuunneqarnermini atorumasai – kalaallisut qallunaatulluunniit – atorlugit kiffartuunneqartussaavoq.

Pisortani suliassat suliarineqartarnerat pillugu Inatsisartut inatsisaanni nr. 8-mi, 13. juni 1994-imeersumi (suliassat suliarineqarnerat pillugu inatsimmi taaneqartartumi) kingusinnerusukkut allannguuteqartinneqarsimasumi § 7 a aamma aalajangersagaq taanna pillugu oqaaseqaatit innersuusuutigineqarput.