Naalakkersuisut Siulittaasuata Naalakkersuisoqarfiata eqqartuussissuserisup tusagassiisarnermik ataqatigiissaarisoq aamma inatsisilerinermi pisortaq pillugu sulianik taaneqartut pillugit misissuineranik tamanut saqqummiunneqarnissaa pillugu aalajangernera pillugu Ombudsmanditut nammineerlunga misissuinermik aallartitsiniarlunga ullumikkut aalajangerpunga.

Tamatuma tunuliaqutaa tassaavoq tamanut saqqummiussineq malittarisassat pisortat ingerlatsineranni atuuttut naapertorlugit pisimanersoq pillugu misissuiniarama.

Misissuineq sulianut marlunnut taaneqartunut taakkununnga tunngassanngitsoq erseqqissassavara. Oqaatigineqareersutulli tamanut saqqummiussineq pillugu ajornartorsiummut taamaallaat tunngavoq.

Inatsisilerinermi pisortaq pillugu suliamik misissuineq eqqarsaatigalugu tusagassiuutitigut nalunaarutiga 12. september 2013-imeersoq innersuussutigaara, tassuunami ersermat suliani soraarsitsinermut tunngasuni nalinginnaasumik – ilaatigut suliami illua’tungiusoq matumani soraarsinneqartoq eqqarsaatigalugu – nammineerlunga misissuinermik aallartitsineq ajortunga, illua’tungiusulli naammagittaalliuuteqarnissaa utaqqimaartariga.

Tusagassiisarnermi ataqatigiissaarisumut tunngatillugu maluginiarpara suliaq atorfinititsinermik kinguneqanngisaannarsimasoq.

Vera Leth